Ka District A.H & Veterinary Office

KA DISTRICT PROFILE JONG KA A.H & VETERINARY DEPARTMENT WEST JAINTIA HILLS DISTRICT JOWAI.

Ka kam ri jingri ka long kawei na ki jaitkam kaba donkam bha kaba lah ban kyntiew ia ka ioh ka kot ha ki thain nongkyndong. Ka tnat jong ka A.H & Veterinary ka dei ka tnat sorkar kaba peit bad kitkhlieh ha ki liang baroh na ka bynta ka jingpynmih, jingpynroi bad jing pyniaidbriew ia ki mar kiba mih na ka kam ri jingri kum ka doh, ka dud, ka pylleng bad kiwei kiwei. Ka long ruh ka tnat kaba peit ia ka bha ka miat, ka koit ka khiah jong ki jingri da kaba iada ia ki na ki jingpang lyngba ki jingai tika bad ai dawai khnang ba kin long kiba koit ba khiah bad ba lait na ki jingpang ba bun jait. Kane ka lah ban wanrah ia ki jingri kiba bha kiba lah ban pyniohnong ia ki nongri jingri ha ki thain nongkyndong. Kane ka tnat ka iarap ruh ia ki nongri jingri da kaba ai jinghikai ia ki lyngba ki Training programme bapher bapher bad ruh lyngba ka vocational training centre hapoh ka District. Ban hikai kumno ban ri ia ki jingri ha ka rukom katkum ka stad science ba mynta khnang ba ki jingiohnong kan long kaba khambun. Kane ka rukom ri ia ki jingri kan kyntiew ia ka ioh ka kot ha ki thain nongkyndong kaba lah ruh ban wanrah ia ka lad ioh kam ioh jam ia ki khun samla kiba lah nang lah stad khnang ba kin lah ban ieng ha la ki jong ki kjat.

Ki kam ki jam jong ka tnat A.H & Veterinary:

• Ban ai ia ka jingiarap ha ka liang ka koit ka khiah bad ka bha ka miat jong ki jingri hapoh ka District.
• Ban pyni bad kdew lynti ia ka rukom ri jingri, ka rukom ai jingbam bad ka rukom pynshongkha ia ki jingri katkum ka stad science ba mynta
• Ban wanrah ia u symbai uba kham bha lyngba ka Artificial Insemination kaba lah ban kyntiew khambun ka jingioh doh, ka dud, pylleng bad kiwei kiwei de.
• Ban iada ia ki jingri na ki jingopang ba bunjait da ka jingai tika bad ai jingsumar ia ki.
• Ban pynbha ia ka imlang sahlang da ka jing iohlad ki samla ban seng ia ki kam lajong lyngba ki skim ba bun jait ba ka sorkar ka ai jingiarap ei.
• Ban pynbha bad pynkiew ia ka rukom ri ia ki jingri kum ki blang, ki sniang bad kiwei de lyngba ki jingpyrshang ban ribha ia ki ha ka rukom kaba bha.
• Ban seng ia ki Farm ban ri Masi, Sniang, Syiar lyngba ki riewshimet lane lyngba ki skim sorkar.
• Ban kyntiew ia ka rukom ri jingri katkum ka stad science ba mynta da kaba ai jinghikai ia ki nongrijingri ha ki Vocational Training Centres bad lyngba kiwei pat ki jingai training sha ki thain nongkyndong da ki doctor lane ki stad science ha baroh kawei ka District.

Hapoh ka West Jaintia Hills District, la seng ruh ia ki Veterinary Hospital bad Dispensaries kiba peit bad pyniaid da ki doctor kiba shemphang bad kiba lah pyntbit ia lade ha kane ka kam. Kine ki Hospital bad Dispensaries nalor ba ki ai jingsumar ia ki jingri, ki ai ruh ka jingiarap da kaba iada iaki jingri na ki jingpang ba bunjait da ka jingai tika man la ka por. Ki don ki Veterinary Aid Centres bad ki Key Village Centres kiba peit ia ki jingbha jingmiat jong ki jingri kiba la seng ha bun ki jaka kiba ha nongkyngdong. La seng ruh iaka Mobile Vety. Dispensaries bad ki Vigilance Unit ha ki Headquarter jong ka District kiba lah ban peit ia ka bha ka miat jong ki nongri jingri bad ki jingri jong ki ha ki thain nongkyndong.